Cahya Ilahi

Munara ngajajar sakuriling bungking. Asmaul Husna terus ngagalindeng tina tiap biwir. Subhanallah! Jalma ngaraliud nyanghareup Ka'bah. Inna akromakum 'indallohi atqokum. Dada ngaguruh. Iman beuki ngandelan. Laa ilaaha ilallah.
Haseup bodas turun ti langit. Angin ngahiliwir, seungit ngadalingding. Reup bray. Oyag-oyagan. Mawa bagja keur nu taqwa.
Tetepkeun haté. Entong galideur. Madep. Panca indra ngahiji. Awas dina poék. Teuneung salawasna.
Niat. Ungkara nu aya dina jero haté.
Paluruh. Asal muasal sagala pagawéan. Lain nu di luar. Ingkeun dina tempatna. Na tempatna. Geura koréh..!
Sora adan ngalanglaeung minuhan jagat. Ungkara suci. Cicirén kudu inget ka pangbalikan. Innalillahi wainna ilaihi roji'un.