Tukang Jajaluk

"Teu kaharti déwék mah naha Si Enjum unggal balik ti kota meni merekis waé duitna, lolobana mah récéhan," ceuk Dasim muka obrolan. Udin seuri leutik, sor mikeun cikopi sagelas. "Kang, naon urusanana jeung salira?" tanya Udin. Anu ditanya sajongjongan ngahuleng. "Nya ari déwék mah panasaran wé," jawabna tamba garing biwir. Gerung-gerung aya motor eureun hareupeun warung, laju nu bogana nyampeurkeun nu keur ngalobrol.
"Jang, kopi sagelas!" pokna. Anu anyar datang ngajak sasalaman ka Dasim, wawanohan. "Jigana salira peryogi padamelan nu énténg tapi mundel hasilna," ceuk manéhna bari melong Dasim. "Aduh leres Kang, naon saratna?" tanya Dasim giak. "Lah énténg pagawéan ieu mah. Urang kudu bisa maénkeun peran jeung kudu kuat méntal," pokna bari mikeun kartu nama laju ngaléos sanggeus babayar. Kartu nama diulak-ilik, aya tulisan 'koordinator'.