Ngudag Kalangkang

Nénjo batur beunghar, hayang nurutan beunghar. Gedé kahayang batan kamampuh. Udagan hirup ngan kakalayangan dina uteuk. Datang jeung inditna tara bébéja. Awak ruksak da kurang urus. Ganti waktu ganti ogé kahayang.
Kamarina kamari panggih jeung babaturan ésdé, geus suksés, bati kumétap. Awakna lintuh jiga awéwé nu reuneuh tujuh bulan. Lain éta nu matak jadi kabita. Anéh. Naha si éta bisa loba duit bari gampang ngalana? Gunta-ganti bikang kawas kana barang. Kamari soré aya béja, si éta dicangkalak kapéka. Awakna geus robah, jadi begung. Ngadadak haté jadi teu kabita deui. Geuning si éta téh kalangkang kuring...