Malem Minggu

Mojang geulis, rambutna panjang, diraksukan singsarwa bodas. Anteng ucang-anggé dina dahan tangkal cangkring jajalanan ka lembur Sarkanjut. Lalaunan ngahariring dibarung seuri nyikikik. "Emaaa... bapaaa kuring hayang kawin.. win... hayang kawin..win. Maot ngora-ngora mémang rugi... hihihihihi...!" seurina kadéngé nepi ka lembur.
Mang Juhé, tukang bajigur, ngaliwat ka palebah dinya bari nanggung daganganana. Indung sukuna teu kahaja titajong kana batu. Ngajurahroh sapisan, daganganana mancawura. "Gugah, Mang!" ceuk nyi mojang bari ngahudangkeun tukang bajigur. "Geulis, hatur nuhun! Untung nyai jadi kuntilanak di dieu, coba mun euweuh sasaha, meureun emang moal aya nu nulungan," ceuk tukang bajigur bari ngajak sasalaman ka nu nulungan.