Lalakon Lutung Kasarung (8)

Lawang panto kelas dijagaan ku barudak baong. Aya Ucup Codét, Opan Cadél, Ujang Pitax, jeung Adul Hapur. Lusi ceurik da pinareupna dicagap Ucup. Asih jejeritan pédah bujurna dikodok Adul. Kabéh barudak awéwé ngalaman apes. Oding, Ketua Murid, teu bisa kukumaha. Najan awakna gedé, manéhna teu wani ngalawan nu opatan mah.
Lila-lila barudak awéwé kompak, rék ngalawan. "Urang rempug ku saréréa mun maranéhna kitu peta waé mah," ceuk Lusi. "Tapi..., kumaha carana?" tanya Asih. Unié nangtung, terus leuleumpangan hareupeun baturna, tarangna kerung. Nyéh biwirna imut bari nepak tarang. Ger babaturanana sareuri sabab bulu mata palsuna ngacleng sabeulah.
Kelas rék bubaran. Asih sabatur-batur geus nyiapkeun siasat. Saurang-saurang nempatan posisi nu geus direncanakeun. Adul Hapur sabalad-balad ngajarega dina lawang panto. Rumpu-rampa awak babaturan awéwé sakelasna nu rék kalaluar. Unggal awéwé jiga nu pasrah. Nu ditoélan rarobah wujud jaradi lutung. Goak Adul sabalad-balad ngajarerit, maranéhna diraponan ratusan lutung nu terus-terusan napuk.