Granat Bin Bom

Gura-giru lalumpatan, nyaralametkeun dirina masing-masing. Riungan bubar sapada harita. "Awas aya bom!" pating corowok. Nu keur jongjon ngalobrol, paburisat. Anu keur dalahar, lalumpatan bari ngahuap. Teu nolih bener henteuna béja nu kadéngé.
"Baku témbak terjadi saat penyergapan di Cigondéwah, tiga téwas dan satu menyerahkan diri dalam keadaan tertémbak kakinya," kitu ceuk réporter telepisi. Imeut neuteup budak ngora nu disebut pamingpin 'terduga téroris'. "Naha asa apal ka éta jalma," gerentes téh.
"Bapaaaaaa, geuningan mantan murid téh janten ketua térorisna," aya inbox ti salah sahiji prén, batur sakelasna nu disebut 'terduga téroris' baheula. "Oh, My God..!" cekéng téh bari neken énter balésan. "Manéh kudu bisa jadi jalma nu terkenal sa-alam dunya!" inget kénéh ucapan kuring baheula ka manéhna waktu keur bimbingan skripsi.