Singhoréng

Jutaan sora humaréwos dina sirah
Gumerendeng
Patingjelengéng
Ngendagkeun uteuk
Sora anjeun pangtarikna
Pinuh katugenah
Gogorowokan
Nyarékan
Duka ka saha
Duka ka urang mana
Uteuk kuring ngagolak
Téténjoan patingburicak
Réwuan gambar ngarangkleung
Dina kongkolak mata
Gambar anjeun pangbéngrasna
Ngudupung luhureun kasur
Nangkeup guguling
Seuneu amarah ngabulen awak nu lenjang
Ngahuru kasur
Tutung
Kuniang hudang
Gugupay kana ranjang
Jleg...!
Jadi lodaya nu matana ngagebur
Nyanggéréng
Horéng huntuna dibéhel..!

(Vijayakusumah, 26 Maret 2014)