Teu arapaleun rahayat mah. Ongkos pemilu téh mahal.
Ngagasaban hak fakir-miskin. Gegedéna dipalingan ku para inohongna.
Partéy jlug-jleg. Embung tinggaleun. Rabeng kawas siraru.
Caleg-caleg lalégég. Asal boga duit. Yakin bakal dipasang nomer jadi. Awéwé ogé
pipilueun.
Kampung-kampung disungsi. Anu jauh dijugjug. Nu anggang
ditéang. Anéh puguh gé.
Jul-jol nu datang. "Abdi pilih, omat!" cenah.
Ngamplopan. Gedé mah henteu. Jiga nu heueuh. Iman jalma diuji.
Perang baliho. Ampir di saban tempat. Rupa-rupa momonésna.
Aragul ku photo diri.
"Colok abdi..!" ceuk Nyi Surti. Aktipis anyar ti
hiji partéy. Lunggak-linggek dina panggung kampanye. "Entong hilap,
nya?!" cenah bari kulat-kelét. Geulis kawas artis.
Dua poé deui kana waktuna nyolok. Imah Nyi Surti
kabangsatan. Nu dipaling lain harta banda. Awakna raca urut nyolokan.
Kapolrés bingung. Ahli kriminil hulang-huleng. Mariksa
tékapé gemet pisan. Panasaran. "Apal beungeut penjahatna?" pulisi
nanya. Nyi Surti gideug. "Ya, sudahlah. Engkau telah mendapatkan apa yang
kau minta," ceuk pulisi bari baralik.
No comments:
Post a Comment