Nganjang Ka Alam Jin (14)

Nyimas Awang Langit kumalayang di jomantara. Guludug pating jelegur. Angin lilimbungan. Nganteur nu miang ka alam manusa. Jin jeung siluman pada nyalingkir, ngajarauhan sang putri nu keur ngumbar amarah. Ajag babaung mapag nu anyar datang. Naga Sasra nunutur tukangeun, ngaping ngajaring. "Geulis, teu kedah rurusuhan!" ceuk naga manghariwangkeun.
Kota Jakarta marakbak katingali ti luhur. Alam katingalina éndah, enya jiga nu éndah...
Adi Bing Slamet ramé paséa jeung mantan guruna dina infotainmen. Lain heureuy. Asli. Manéhna jeung sawatara baladna ngarasa dirugikeun ku nu ngaran Ĕyang Subur.
Jelebét, pipi kempot Si Ĕyang aya nu nampiling teu pupuguh. "Ieu ganjaran keur jalma tukang nipu," ceuk hiji sora tanpa wujud. Nyawa si éyang digusur sakadang naga ka alam siluman.