Hadiah Lebaran

Malem takbiran masih kénéh di tempat pagawéan, ngalembur. Utang-itung, bekel keur mudik pas-pasan. Kerung. Ema jeung Abah omat-omatan nitah lebaran di lembur. Niat geus panceg, pasusubuh inditna. Anak jeung pamajikanana moal diajak.
Kolébat imut indungna, kabayang kanyaahna. "Ema, ieu abdi nyandak pamundut salira," gerendengna. Udin neuteup bungkusan na lahunan, laju diusapan bangun deudeuh. Reup peureum, kasaréan nepi ka tujuan.
"Entong sedih, indung manéh geus dua poé dikuburna," ceuk bapana. Manéhna ngarumpuyuk, kapiuhan. Aya bungkusan nu murag tina leungeunna...